Nasabi na'to ni Zafra pero babanggitin ko na rin dahil yun rin ang palagay ko.

Hindi lahat ng nakasulat sa blog na ito ay totoop pero hindi ibig sabihin nun ay sinungaling ang manunulat.

Hindi lang naman sa personal na buhay sumasalamin ang isang likha, hindi naman ako gaya ng ibang writer na sabi nga ni jun cruz reyes ay "tila nilalagnat ang guni-guni." May problema kaya nakakasulat, halimbawa ay ang problema sa lipunan na tumatagos sa personal na karanasan ng bawat indibidwal.

Maraming problema, kaya maraming pwede at dapat isulat.

I. BRA

Babae 1: Kaya ako, hindi ako nagba-bra. It only enhances the shape of my breasts, making me more prone to men's disrespect!

Babae 2: Lalong maa-attract ang mga lalake kung wala kang bra.

Babae 3: Unfair. Kahit anong gawin ng babae, siya pa rin ang talo.

II. BOYFRIEND

Babae 4: Wala kang magagawa kung ako ang gusto ni Lalake 1! Ayaw na niya sa'yo. Ako ang mahala niya kaya tigilan mo na kami!

Babae 5: Una siyang naging akin. Mang-aagaw ka!

Babae 6: Wow ang haba ng hair ni Lalake!

Babae 7: Pare-pareho lang tayong mga babae, bakit tayo mag-aaway dahil lang sa isang lalake!

Babae 6: Siguro dahil 1 is to 5 ang ratio ng mga lalake sa babae.

Babae 7: E, kung pareho n'yong iwan si Lalake?

Babae 4: Buntis ako.

Babae 5: Buntis din ako.

Babae 6: Hindi problema yan. Tayo ang magpalaki sa mga batang yan. Hindi natin kailangan ng mga lalake.

Babae 7: Kaya ako, ayokong mag-asawa.

Babae 6: Akala ko gusto mong magka-anak?

Babae 7: Kailangan ba ng lalake para magka-anak? Ang dami-daming bata diyan, inabandona ng sarili nilang mgaulang. Di ko kailangang mabuntis para magka-anak.

Babae 6: Winner!

Humihingi ako ng tawad sa blog na ito. Di ko man lang ito nabati ng happy 2nd anniversary nung Agosto 2006. Bilang pagbabalik-tanaw, ibinabalik ko ang huling draft at unang entry sa blog na ito:


SA TAGUMPAY NG REBOLUSYON

Nagbabaga ang dapithapon
habang yinayakap ng hangin
ang mukha ng kabundukang
aking kinahihimlayan.
Binulag man ako ng balang
bumaon sa kaliwang mata,
malinaw kong natatanaw;
Pinatahimik man ng busal sa aking bibig,
ako'y nangingiti;
Wala nang dugong dumadaloy
sa mga ugat ng aking mga kamay,
nakakapa't nararamdaman ko pa rin
Malapit na ang tagumpay.

Monologue:

Babae: Anong ibig sabihin nu'n? Lalake ba ang type mo kaya wala na'kong pag-asa sa'yo? O dahil nahuli ako ng pitong taon? Hindi ko kasalanang nung 1986 lang ako pinanganak. Oo nga, mas bata ako sa'yo, pero pareho lang tayo mag-isip, kaya lang, hindi pareho ang nararamdaman natin. Ako lang ang nagmamahal. Ikaw, manhid.

(Saka na yung prequel ng monologue na'to.)

Mabuting mahinog, pero sabi ng iba, kung sobrang hinog, lalong madaling mabulok. Ang sabi ko naman, huwag matakot mabulok, walang binhing sumisibol nang hindi nabubulok. Natural na proseso para sa mga halaman, natural din sa tao. Nabubulok ako ngayon, darating ang araw, sisibol din.

Luha ang didilig sa lupang pinaglibingan ng dating sarili, ng nakaraan. Ibabaon natin ang mga pagkakamali, at aasang di na ito tutubong muli.

Bukas, sisikat ang araw; dadaan ang hangin. Tayo'y magpapatangay tungo sa tagumpay.

Kailan ito malalaos? Kailan ito unang nauso? Sinong pasimuno nito?

Alin ka dito:

Relihiyoso: Kailanman ay hindi malalaos ang pag-ibig, 'pagkat ang Diyos mismo ang maylikha nito.

Tibak: Walang masama sa pag-ibig, yun nga lang, sa kalagayan ng lipunan ngayon, umiiral ang maling konsepto ng pag-ibig---makikita ito sa ugali at pagkilos ng mga tao, halimbawa, ang patuloy na pagiging submissive ng mga babae sa kanilang mga karelasyon.

Ano pa ba?

Sa bahay. Linggo. Umaga, bandang alas-diyes. Kagigising lang ni Mister na kaninang alas-singko lang umuwi, amoy alak, amoy babae. Si Misis naman, dahil Linggo, nag-general cleaning.

Mister: Pasensya ka na ha, inumaga na'ko nang uwi. Nag-OT ako. Ano yang ginagawa mo?

Misis: Di mo ba nakikita?

Mister: Itatanong ko ba kung alam ko?

Misis: Linggo ngayon, nag-ge-general cleaning ako.

Mister: O teka, teka, teka. Mga damit ko yan, ah. Bakit mo nilalagay sa trash bag?

Misis: Di mo ba narinig ang sinabi ko? Nag-ge-general cleaning ako. Ang mga bagay na ito, wala nang halaga sa akin, walang silbi. Basura, kaya itatapon ko na.

Mister: Anong ibig mong sabihin?

Misis: Itatapon na rin kita. Bago maghapon, kailangang malinis na ang bahay.

Matapos isilid ang mga gamit ni Mister, nagwalis at naglampaso naman ng sahig si Misis.